Soraluzeko hilketa matxista gaitzetsi dute, eta salatzeko deia egin dute
33 urteko gizon bat atxilotu dute, ama hiltzea leporatuta. Aste batean Euskal Herrian hil duten hirugarren emakumea izan da. Arratsean balkoietatik mobilizatzeko deia egin dute.
Ertzaintzak 33 urteko gizon bat atxilotu zuen astelehen goizaldean, bere ama hiltzea leporatuta. Indarkeria matxista kasu berri hori (Euskal Herrian astebetean hil duten emakumea da) salatu dute Oarsoaldeko lau udalek, Errenteriako Berdintasun Kontseiluak eta Pasaiako Emakumeen Mahaiak.
Oarsoaldeko Mugimendu Feministak egindako deialdiarekin bat egin dute. Gaur arratsean kazerolada zaratatsua egiteko deitu dute, bakoitza bere balkoi edo leihotik. 21:00etan izango da mobilizazioa. Gainera, Oiartzungo Feministen Asanbladak balkoietan zapi moreak jartzeko deia luzatu du.
Indarkeria matxista ez dutela onartzen jakinarazi dute eragile eta erakunde horiek: “Jendaurrean eta aho batez adierazi nahi dugu emakumeenganako indarkeriaren aurkako jarrera agertuko dugula. Horrelako gertaerak ez ditugu gure gizartean onartzen, eta erakunde, elkarte eta herritarrok lanean jarraituko dugu, emakumeok indarkeria matxistarik gabe bizi gaitezen”.
Oarsoaldeko lau udalek zein Pasaiako Emakumeen Mahaiak eta Errenteriako Berdintasun Kontseiluak elkartasuna adierazi diote hildakoaren gertukoenei.
Telefonoa, martxan
Indarkeria matxista jasan dutenentzako telefono zenbakiak martxan jarraitzen du. 900 840 111 zenbakia da. Eguneko 24 ordutan dei daiteke, eta konfidentzialtasuna gordetzen du. Gainera, telefonoaren fakturan ez du arrastorik uzten. 51 hizkuntzatan erantzuten dute.
