"Bestelako zaintza sistema" bat aldarrikatuko dute M8an
Oiartzungo Feministen Asanbladak mobilizazioa egingo du asteazkenean, eta zaintza eta ongizatea bermatzen duten eragileei leku egingo diete.
Zaintzan lan egiten duten herriko eragileei toki egingo diete mobilizazioan. Datorren asteazkena martxoaren 8 da, eta horren harira, Oiartzungo Feministen Asanbladak mobilizazioa deitu du. Plazan hasi eta bukatuko da manifestazioa, eta ondoren ekitaldia egingo dute. 18:00etan jarri dute zita.
Euskal Herriko Bilgune Feministak zaintzaren gaia landu eta aldarrikatzeko deia egin du, eta herriko mugimendu feministek gonbita horri keinu bat egingo diote. “Beste zaintza sistema bat aldarrikatuko dugu, egungo sistema ez baita jasangarria eta ez ditu pertsona guztion beharrak asebetetzen. Gainera sistema pribatua da egun gailentzen dena eta hein handi batean, emakume migratu eta arrazializatuek eusten dute, baldintza oso kaskarretan”, adierazi du Oiartzungo Feministen Asanbladak.
Manifestazioa, geldialdiekin
Aurreko urtetan bezala, manifestazioak geldialditxo batzuk egingo ditu. Aurten hiru izango direla jakinarazi dute: irakurketa bat, kopla batzuk abestea eta beste irakurketa batek osatuko dute.
Martxoaren 8ko mobilizazioak zaintzan lan egiten duten eragileei egingo die tokia: HELTA, Killirikupe, etxez etxeko langileak, osasungintzakoak, El Watan, Abaraxka ludoteka…
Oiartzungo Feministen Asanbladaren arabera, eragile horiek guztiek zaintzan egiten dute lan. “Zaintza ez da sanitarioa bakarrik. Garbitzaileen lana, kultur ekintzak edo aisia ere zaintza dira, denon ongizatearen alde egiten baitu”, gaineratu dute.
Gainera, eragileei leku egitea ez da aitortza sinboliko hutsa izango. “Bakoitzak bere errealitatea bizi du, eta beraiek ezagutza daukate errealitate hau aldatzeko. Horri buruz hausnartzeko abiapuntua izango da manifestazioa”.
Bihar, hitzaldia
Asteazkenekoa ez da Martxoaren 8aren bueltan antolatutako ekitaldi bakarra izango. Bihar eguerdian, Labore Oarsorekin batera antolatuta, Agroekofeminismoari buruzko hitzaldia emango du Amets Ladislaok. 12:00etan hasiko da, pleno aretoan.
Ekitaldi berean, Arantxa Zapirain Oiartzabalek Amalur Saria jasoko du.
