Iraitz Pazos: "Ez dugu baimenduko indarkeriaren bidez norberak justizia bere esku hartzea"
Iraitz Pazos Trintxerpeko alkateordeak azken egunetan emandako gertakariekin "oso larrituta" daudela esan du. Udalaren esku dauden "baliabide guztiak" martxan jarri dituztela dio.
Azken egunetan Trintxerpen izaten ari diren liskarren harira, Iraitz Pazos alkateordearekin hitz egin du HITZAk. Ematen ari diren gertakariengatik “oso larrituta” daudela esan du eta bizikidetzaren aldeko mezua bidali nahi izan die herrikideei.
Alde batetik, joan den astean izandako liskarrengatik larritasuna adierazi du, “herritarrengan segurtasun ezaren sentsazio nabaria eragin dutelako eta nolabait haserre eta ezinegona sortu dutelako”. Baina, bestetik, herritarren mobilizazio baketsuak egon diren arren, “zenbait herritar modu ez baketsuan” mobilizatzen ari direla salatu du alkateordeak, “indarkeria erabiltzeraino”. Azken hauen jarrerarekin “oso larrituta” daudela erantsi du eta garbi utzi nahi izan du “bai batak zein besteak erabat arbuiatzen ditugula eta ez ditugula inondik inora babestuko gure herritarrek beldur sentsazioa izatea”.
Era berean, norberak justizia bere esku hartzea ere ez dutela “inondik inora ere onartuko” esan du Pazosek, ezta ere “biolentziaren bidez edota marko legala errespetatzen ez duten mezuen bidez beste batzuk iraintzen doazen herritarren jarrerak”.
Udalaren aldetik “arazoaren erroari ekiteko baliabide guztiak” martxan jarri dituztela erantsi du, “gure esku dauden baliabide guztiak”. Arazoa “anitza” dela gaineratu du, “ez da Pasaiako arazo esklusiboa, eta momentu honetan beste hainbat herritan ere ikusten ari gara horrelako arazo eta jarrerak”. Baina, jarrera horiek ezin direla justizia norbere esku hartzeko argudio izan nabarmendu nahi izan du. “Gizarte arloan lanketa abiatu dugu. Udalak hasiera-hasieratik bere esku dituen zein Ertzaintzarekin koordinazioan ezarri ditugun prebentzio errekurtsoak martxan jarri ditugu”, esan du azkenik.
