Kanadako ordezkariak Pasaian dira jada
Martxan da Pasaia Itsas Festibalaren laugarren ekitaldia. Kanada da ohorezko gonbidatua, eta Pasaian da jada 30 lagun baino gehiagoko ordezkaritza.
Martxan da Pasaia Itsas Festibalaren laugarren ekitaldia. Igandera (hilak 17) bitartean Pasaiako badia nazioarteko itsas kulturaren topagune bilakatuko da. Aurtengoak bi izen propio ditu: San Juan baleontzia eta Kanada. Kanada da laugarren edizioko ohorezko gonbidatua, eta Pasaian da jada 30 lagun baino gehiagoko ordezkaritza.
Teo Alberro Pasaiako alkateak, Xabier Agote Pasaia Itsas Festibalaren zuzendariak eta udalean ordezkaritza duten alderdi politiko guztiek ongietorria egin zioten atzo Kanadako ordezkaritzari. Kultura eta nazio ezberdinetako ordezkariak etorri dira Pasaiara festibalaren laugarren edizioaz gozatzera. Horien artean dira Philip Earl Kanadako Gobernu Federaleko legebiltzarkidea eta Ternua eta Labradorreko ordezkaria, Jack Penashue Innu nazioaren ordezkaria, Johannes Lampe Nunatsiavut-eko presidentea eta Yvan Boivin Manawan nazioaren ordezkaria.
Ordezkariek herrien aitortzaren, hizkuntzaren, kulturaren eta autodeterminazioaren aldeko aldarrikapenak egin zituztela adierazi du Pasaiako Udalak. Kanadako nazio batzuetako hainbat ordezkarik beren herrien borrokek eta Euskal Herriaren memoria eta aldarrikapen nazionalek lotura eta paralelismo mordoa dituztela baietsi zuten.
Manawaneko Atikamekw Kontseiluko Yvan Boivin ordezkariak azaldu zuen nazio indigena gisa “nazioartean presentzia eta aitortza lortzea” direla beren helburuetako batzuk, “beste herriekin harremanak sendotuz” eta beren “harreman kolektiboa, kultura eta jakintza tradizionalak defendatuz”. Horrez gain, belaunaldiz belaunaldi transmititutako itsasoari eta lurraldeari lotutako jakintzak “subiranotasun kulturalaren adierazpen bizia” direla nabarmendu zuen Boivinek, eta kultura bera “herri baten aitortza politiko eta nazionalerako tresna ere badela” aldarrikatu zuen.
Teo Alberrok Kanadako herri eta nazio ezberdinen parte hartzea balioan jarri zuen: “Oso esanguratsua da herri eta nazio ezberdinetako ordezkaritza hau Pasaiara etorri izana, eta guretzako benetan garrantzitsua da egunotan partekatuko dugun denbora, elkarren arteko historiak, aldarrikapenak eta bizipenak ezagutzeko aukera izango baitugu. Gure herrietako bakoitza bere hizkuntza, memoria eta nortasuna defendatzeko egiten ari den bideetan, ziur naiz lotura handiak aurkituko ditugula. Era berean, aberastasun eta aniztasun handia izango da aurten ere festibalean, eta Pasaiak bere historia eta izaera partekatuko dituela harrotasunez”.
Erakundeetako ordezkariek opari trukea ere egin zuten. Alberrok, udalaren izenean, herriko itsas kultura eta ondarearekin lotura berezia duten zenbait oroigarri eman zizkien gonbidatuei. Besteak beste, Pasaiako bateleren txano bana eman zieten, “herriko historiaren eta itsas kulturaren zati garrantzitsu bat irudikatuz”.
Batelerak garai baten Pasaiako badiaren alde batetik bestera pertsonak eta salgaiak arraunean eramaten zituzten emakumeak ziren, “emakume aitzindariak, komunitatea lotzen eta herria elkartzen zutenak”. Gaur egun ere bateleren irudia “herri nortasunaren, askotan ezkutatua izan den emakumeen ekarpen historikoaren eta itsasoarekin lotutako ondare biziaren sinbolo” dela adierazi du udalak.
