Kirol Asteak herritarren artean izandako harrerarekin pozik dago udala
Udalak balorazioa publiko egin du: 550 pertsonek hartu dute parte antolatu diren ekitaldietan. Eragileen inplikazioa ere goraipatu dute.
Udane Arbelaitz, Udane Loidi, Gaizka Lasa eta Alain Isasa, Kirol Mahaian.
Pasa den astean egin zuten Oiartzungo Kirol Astearen seigarren ekitaldia. Aste erdian zuen tendentzia berretsi, eta arrakastatsutzat jo du Oiartzungo Udalak. Gaur egin du publiko balorazia, eta oiartzuarren parte hartzea txalotu dute.
Izan ere, 550 lagunek parte hartu dute ekitaldietan. Pasa den asteko eguraldi kaxkarrak kanpoan egindako ekitaldien parte hartzearen arrakastan eragina izan zuen arren, aterpean egindakoak jendetsuak izan ziren.
Ion Treku Kirol teknikariak azaldu duenez, Kirol Astea oiartzuarrentzako zita garrantzitsua bilakatu da. “Ikusten dugu jendeak gogotsu hartzen dituela antolatutako jarduerak”, azaldu du Trekuk.
Herriko elkarteen inplikazioa ere goraipatu du Oiartzungo Udalak, eta eskerrak eman dizkiete emandako laguntzarengatik.
